Магасера таханарча кердадарех йола Ишкол кагирхой вахар хувцаш я
Театра, кинон, таханарча кердадарий Ишкол Магасе болх беш йола кхоалагӏа шу да. ӏамарханаькъан Мухьмад ва цу моттига кулгал дер. Кагирхой вахаре лоархӏаме, боккха пайда боаржабеш проект я ала йиш я цох. Мах боацаш сурташцара, видеошцара, звукорежиссурацара, иштта кхыдолча оагӏонашцара болх ӏомабе йиш я цига тахан.
«Къаьстта терко тӏаозаш я звукорежиссуран студи. Цу оагӏон хьалха латташ вола Тиймарзанаькъан Нурдин тахан республике дикка вовзаш ва. Вокал дӏаязъяр, (DAW) лоархӏамеча станцешка болх дӏабахьар, иштта кхыдола оагӏонаш довзаш ба цу чура кагирхой. Хӏаьта карарча хана эггара керттера йолча проекта тӏа къахьегаш, гӏалгӏай меттала мультфильм дӏаяздеш ба студе.
Вай къаман культуран оагӏонца геттара лоархӏаме болх ба из тахан. Шоай оазашца болх беш, актёрашца бувзам лелабеш, дуккхадараш довза аьттув ба къонабарий», - дийцар «Сердалога» ЦТКиКИ зарбан болх лелабераша. Кагирхошта боккха аьттув луш моттиг я из. Дӏахойодача хана вахаре накъадаргдола гӏулакх дикка шаьрде йиш я цар цига. Шин шера йола курс чакхъяьккхача, лицензированни сертификат хьаэц цига дешаш болча кагирхоша.
