Балтийски ӏилман-инженерни яхьашка белгалваьлар Магасера дешархо
03.03.2026 09:45
XXӏӏ Балтийски ӏилман-инженерни яхьашка белгалваьлар «Кванториум» яхача берий технопарка доакъашхо. Из хоам «Сердалога» бир цу моттига администратор йолча Налганаькъан Мадинас. Санкт-Петербурге дӏайихьар кхетаче «ӏилман ха» яхача ганзо.
ДӀабахача бетта 26-ча денгара 28-ча денга кхаччалца шоай начӏал, говзал гойташ хилар 250 совгӏа проект кхеллараш. «Техник, робототехник» яхача оагӏонца 70 совгӏа болх гойтар дешархоша. Кхелахой бар ӏилман институташкара, вузашкара 150 совгӏа болхло.
«Хьаькъал дола микроклимат» яхача проектах кхоалагӏа моттиг яьккхар вай мехкахочо Албохчанаькъан Зубейра. Цӏагӏарча фецара тӏунал, йӏовхал малагӏча боараме латт хьажа йиш йолаш болх ба из.
