Терроризма духьала дӀакхахьа безача балхах дувц дешархошка
Терроризм яхача доккхача зулама духьала къовсам лоаттабеш, дӀакхахьа безача балхах дийцар ГӀажарий-Юртарча культуран цӀагӀа. Юртарча пхе ишколера 300 совгӀа дешархо вар цига гулвеннараш. Из тема мел лоархӀаме я кхетадеш, боккхийчар мел дувцачунга дикка ладувгӀаш, баьгӀар дешархой.
«Терроризм яхар мел бӀеха, доккха зулам да цар кхетадергдолаш, цу унзарча гӀулакхах лаьца документальни кино хьекхар цига. Цу чу гуш дар, тайп-тайпарча моттигашка цу зуламо малагӀа лар йитай. «Вахаре сага малагӀа никъ хьалаца беза, цу бӀехача гӀулакхах мишта лоравала веза хьалхадоаккхаш, къамаьл дир берашка Шолжа кхалерча администраце кулгалхочун гӀонча волча Новразанаькъан Тамерлана, ГӀажарий-Юртарча администрацена хьалха латтача, республикерча Россе МВД, ВВ ветераний Совета доакъашхо волча Йовлой Ювсапа», - дийцар «Сердалога» цу моттигера.
Берий хаттарашта жоп луш, цӀенагӀа, нийсагӀдар царна довзийташ, болх дӀабихьар цига.
Культуран цӀен библиотеко кийчбаьбар «Терроризм - адама боккха кхерам» яха гойтам. Цу доккхача зуламах хьокхавенна саг ший, шийна гонахьарча наьха ираз доадаьрех волга, цхьаккха хӀама бекхам боацаш дусаргдоацилга дувцаш, болх лоаттабир кхувш йоагӀача тӀехьенца.
