Магаса дешархошта хьалхадаьккхар, шатлакхаш мишта лелае еза
23.12.2024 13:06
МЧСа болхлоша хьехама болх дӀахьу дешархошца керда шу хьатӀадоагӀаш. Цу тайпара кхетаче хилар Магасе дешабагӀарашца, из кхетаче дӀахьош тӀахьожам лоаттабеча боахама болхлоша дешархошта дийцар шатлакхий гӀирсаш леладеш хьалхарча аргӀагӀа ха дезар. Из хоам газетага бир республикан МЧС зарбан-болх лелабераша.
Геттара чӀоагӀа белгалдир, берашта ховргдолаш: йоагаш йола шатлакхаш нах болча е хьайбаш долча дӀа-юха ма тувса; йоагаш йола уж бе ма йоахкае; нагахьа санна из хьал ца лоталойя, цӀаькха из лотае ма хьажа; йоагача хана 5-10 метр цунна юхе ма хила.
