Магаса дешархошта дийцар ГӏалгӀайче Россех дӀакхетарах
ГӏалгӀайче Россех дӀакхийтта Ди хьатӀадоагӀаш, Магаса №2 йолча юкъерча ишкола дешархошта исторе йийлла урок елар. «Россех ГӏалгӀайче дӀакхетар» яха лекци ешаш яр ГӏалгӀай къам мехкахдаккхара дагалоаттама Мемориала экскурси лелаю ӏажанаькъан Мадина. Цо берашта хьалхадаьккхар, тушола бетта 256 шу доалаш хилар из лерхӀам бола дош гӏалгӏаша тӀаийца, шоай вахар Россе паччахьалкхенца цар дувзадаь. Экскурси дӀахьош хинначо дика довзийтар 1770 шера хиннар, Онгашта хьалчуоттача вахара лоархӀаме каьхата гӀалгӀаша кулг яздеш.
«XVӏӏӏ бӀаьшерен 70-ча шерашка денз, гӀалгӀай истори дувзаденна хилар Россе паччахьалкхенца. 1977 шера тушола бетта, Онгашта гаьна доацача къухен «Барта Босе» лоархӀаме моттиг нийсъелар, дошоча алапашца яздир гӀалгӀай къаман истори, Цига дув биар Россена мутӀахьа хилара. Цу хана денз, гӀалгӀай шоай дош лорадеш хьабоагӀа, массадолча Россе тӀемашка дакъа лоацаш. ДикагӀа бола вай къонгаш тешшаме амал деш лаьттар Даьхен доазонаш лорадеш. Сийлахь- боккха тӀом латташ а дукха дика гӀулакхаш карагӀдаьннад гӀалгӀашта. Уж дакъа лоацаш хилар Сталинграде, МагӀалбике, Брестски гӏапа чу тӀемаш латтача хана, цар цкъа гойта Ӏийнадац шоаш Даьхен хьашташ кхоачашдара кийча болга», - аьлар «Сердало» газетага из кхетаче вӀашагӀъеллараша.
Цу тайпара кхетаченаш дӀахьош хилча; дешархой таро хул цхьоагӀо, барт хилара лоархӀам бовза. Дешархоша шоай хьамсарча мехка истори юха кердадаьккхар, иштта цу ханашка бувзама гӀулакхаш мишта леладаьд ха ловш дола шоай хаттараш делар.
