Наха низ баро деча зуламах, дийцар Магӏалбикерча дешархошта
Терроризм яхача, эггара доккхагӏа долча зулама хетаяь кхетаче дӏахьош хилар, Магӏалбикерча № 2 йолча ишколе. Дийша нах, шахьара администраци, иштта кхыбараш гулбенна моттиг яр из. Кхувш латтача вай къонача тӏехьенна терроризм яхар мел бӏеха, доккха во да хьалхадоаккхаш бар боккхийбараш.
«Кагирхошка массахана дӏадувца деза, цу бӏехача гӏулакха юкъеваха саг ший ираз доадаьрех волга. Дийшача наха дешархошта хьалхадаьккхар, бусалба дина духьала дола, Дала бекхам бергбола зулам из долга. Интернета оагӏонашка гӏолла, къонабараш тувлбе, цу юкъе чуоза гӏертарашка вӏалла ладувгӏа йиш йоацилга, моллагӏа тешаме ца хета хӏама хоаделча ӏалаьмате чехка ӏаьдалга хоам бе безилга, хьалхадаьккхар дешархошта», - дийцар «Сердалога» Магӏалбикерча администраце зарбан болх лелабераша. Гуш дар, къонабараш дукха хӏама довза ловш болга, цар тийннача хаттарех.
Белгалде деза, иштта йола кхетаченаш тахан лоархӏаме йолга. Вай массане хьаллоацаш, хьаькъала, кхетама дикка чӏоагӏбаланза бола дешархой лорабара тӏехьа фийла долаш, дӏабахьа беза боккха болх ба из.
