Харцача наькъ тӏа балара бахьанех дийцар Наьсарерча студенташца
Тахан кагирхой во оамалаш ӏомаеш, харцахьарча наькъ тӏа балара бахьанех дувцаш, кхетаче дӏайихьар кагирхой гӏулакхех йолча комитета Наьсарерча политехнически колледже. Цох лаьца «Сердалога» дийцар КДМ доакъашхоша. Кагирхой гӏулакхех йолча комитете керттера болхло волаш къахьегаш волча, СВО ветерана Шоанахой Муслима дӏайихьар кхетаче.
Спикера белгалдечох, кагирхой воча оамалашта тӏаозаш цхьацца бахьанаш хул. Кхувш латтарашта массахана цӏенагӏдар, нийсагӏдар дешара моттигашка, цӏенъюкъе хьалхадахар мел лоархӏаме да дийцар цо. Воча, зуламе долча хӏаманца ший вахар толхадар, наха юкъе ше тешам байна саг хинна дӏаоттавар ираз дайнача гӏулакхех долга белгалдир СВО ветерана.
«Кагирхоша кхетаде деза, цо мел боаккхаш бола гӏа вахаре лар юташ болга, цкъа ший цӏи воча гӏулакхашца дӏахазийтача сага юха тешаме саг хинна дӏаотта хала долга. Дикача, беркатеча хӏаман тӏакхувш ваха веза саг, из даиман ший дег чу леладе декхарийла ва из», - дийцар Шоанахой Муслима.
