Магасера СОШ- Берий беш № 1 ший хьаьший тӀаэцаш хилар
Магасерча № 1 йолча ишколо-берий бешо ший наӀараш хьайийлла, хьаьший тӀаэцаш. Бераш, хьаьший, берий даьй, ноаной юкъе болаш линейка дӀайихьар ишкола коа.
«Керда дешара шу доладаларца дешархой даькъалабувца баьхкабар республикерча Россе ФСБ болхлой Синицын Вадим, республикерча Россе эпсарий оагӀон исполкома кулгалдеш вола Галай Руслан, ГБОУ СОШ- ДС №1 кулгалхо йола Хьашанаькъан Танзила, берий бокъонех йола викал Чахкенаькъан Зарема, Казахски спорта Академе профессор Сукенаькъан Махьмад-Гири, дешарани Ӏилмани гӀулакхех йолча министерствон болхло Мержой Зенйнап, Халкъа Гуллама депутат Дзейтанаькъан Мухьмад», - йоах тха газетага бенача хоамо.
Республикерча Россе УФСБ кулгалхо волча Шевляков Максима дика дешаш, лаьрхӀар кхоачашдара наькъ тӀа дикка къахьегаш дӀачакхбала даькъалабийцар дешархой. Иштта, Россе ЦСН ФСБ вӀашагӀъехка хиннача «Бештаугорски ловзараш» яхача тӀема-спортацарча яхьашка дакъа лоацаш хиннарашта совгӀаташ дийкъар цо.
Лакхерча классашка дешаш долча берашца Денала урок дӀайихьар цига. Дешархошта дийцар Россе истореца дувзаденнарех, ветеранаш лархӀар, цар сий деш хилар, тӀема гӀулакхаш Ӏомадар тахан лоархӀаме долгах. Кхувш латтарашца иштта кхетаченаш дӀакхахьаро цар Даьхенцара безам чӀоагӀбу, нийсадар, харцахьардар къоастаде Ӏомабу.
