Кавказерча инвесткхетаче белгалваьлар, вай университетерча Медиамоттига доакъашхо
Студенташта юкъе лакха начIал дола, кхоллама балха тIехьа къахьега ловш бола нах гучабахарах, хьаллацарах долча гIулакха терко йир Шолжа-ГIалий тIа дIайихьача Кавказерча кхетаче. Къилбаседа Кавказерча вузашка, Ломоносова цIерах йолча МГУ, «Москвера энергетически иститут» яхача НИУ дешаш болча студенташца ше Iомадаьр, шийна дайзар декъаш хилар вай паччахьалкхен университетерча Медиамоттига доакъашхо вола Овшанаькъан Абу-Бакар. Лакхарча боараме шоай гIулакх дIагойта, тIахьожаш багIараш шоашта раьза хилийта аьттув баьлар из юкъе хиннача студентий тоабан.
«Медиа лаборатори яхача оагIонца болх дIахьоча студентий аьттув хилар Россе паччахьалкхен вице-премьер волча Новак Александраца; Iилман, лакхерча дешара кулгал деча Фальков Валереца вIашагIкхийтта, царга хаттарш де. Кхетачен кхаь дийнахьа студентий тоабаша гойтар КИФе дIахьоча балхах, Къилбаседа Кавказе хьаьша тIаэцар мишта латт», - дийцар «Сердалога» университета зарбан болх лелабераша.
Дуккхача хIаманна аьттув луш хилар Овшанаькъан Абу-Бакара, цун тоабан цига котбалар. Кхыча мехкашкарча цу мугIаре къахьегарашца, Москве кхетаче хургья цар, иштта шоай проекташ массанена дIагойта, Iомадаьр кхыбарашта хьалхадаккха аьттув хургба.
