ГӀалгӀай къаман
юкъара газет

Новости


Илдарха-Гӏалий тӏа «Самбона тӏехьа- Россе Низ» яха яхь дӏайихьар

Илдарха-Гӏалий тӏа «Самбона тӏехьа- Россе Низ» яха яхь дӏайихьар

Илдарха-Гӏалан Дзейтанаькъан Х.Р. цӏерагӏча спортивни ишколе самбох йола яхьаш дӏайихьар. Уж хетаяь яр Ерригроссийски цу спорта оагӏон ди хилара. «Самбона тӏехьа - Россе Низ» яха яхьаш дӏахьош гулбелар дӏаболалуш бола спортсменаш, тренераш, беза хьаьший. Уж хьаллаца баьхкар Илдарха-Гӏалан кхела кулгалхочун гӏонча Амаканаькъан Хьусен, «Цаӏ йолча Россе» парте даькъ тӏара депутаташ, иштта парти хьаллоацараш. Къонача атлеташа спортивни метта тӏа гойтар шоаш дика кийчо яь, кадай, коталонга тешшаме болхаш хилар. Берашта уж яхьаш дӏаяхьарах бокъонца дола цӏай хилар.

«Самбо - из спортивни къовсам хинна ӏац. Из я оамала ишкол, гӏулакхаш нийса леладар, шийца яхьеваьнна спортсмен лархӏа хар, лаьрхӏачунга кхачар. Лоархӏаме да, вай бераш могашал йолаш хьалкхедар, уж спорте дакъа лоацаш хилар. Таханарча яхьаша хьагойт Илдарха-Гӏалий тӏа дика хьалаш, иштта хьехамчаш хилар, цар лерттӏа кхетам луш хьалкхеду къона ноахал. Тха декхар да цу тайпара болх хьаллацар, спортивни ишколашта новкъостал дар, берашта дика дегӏаахара дола хьалаш хьакхоллар», - аьлар «Сердало» газетага Амаканаькъан Хьусена.

Яхьаш чакхъяьлча котбаьннарашта майдилгаш, сийлен грамоташ, «Цаӏ йолча Россе» парте Гӏалгӏай моттигерча оагӏоно шийгара дагалоаттама совгӏаташ делар. Укхаза иштта терко йир хӏара дийнахьа царца къахьегаш хьабоагӏача тренерий а. Физически культура дегӏайоалаяра, кхувш йоагӏача тӏехьенна кхетам балара даькъ тӏа цар къахьегарах, баркал аьлар спортивни ишкола кулгалхочунна Новразанаькъан Мухьмад-Башира, тренера Султиганаькъан Мухьмада.

Цу тайпара яхьаш дӏаяхьар лоархӏаме да «Цаӏ йолча Россе» парте Халкъа программа кхоачашъеча, берий-ондаргий спорт хьаллоацаш, унахцӏена вахар леладеш хилар берашта хьалхадоаккхача.

Электронни газета язле

(PDF) кӀира цкъа арадувла къаман юкъара «Сердало» газет, цӀагӀара ара ца воалаш деша таро я

Хьаязде
Вверх