Тайп-тайпара балхаш де ховш бола говзанчаш кийчбергба республике
Инженераш, технологош, электронщикаш, туризмеи ӀТ-оагӀонцеи къахьегараш кийчбу вай мехкарча дешара моттигашка. Из хоам «Сердалога» бир Мехкадаь зарбан болх лелабераша.
«Керда никъ къахьегаш дӀаболабе беза, хӀана аьлча, ше леладеча хӀаман тӀехьа гаьнавала ловш волчо цу балхаца дувзаденнараш дикка Ӏомаде, карадерзаде деза. Таханарча дийнахьа вай мехка тайп-тайпара говзанчаш кийчбеш йола 31 колледж я. Цу моттигашка Ӏомадераш таханарча хано дӀадеххача тайпара хилийта дагахьа къахьег мехка», - белгалдир вай Мехкадас Келаматанаькъан Махьмуд-Ӏаьлас, цу оагӀонцарча балхах дувцаш. Таханарча вахаре геттара чӀоагӀа эшаш йола говзалаш Ӏомаергья кагирхошта, тӀадоагӀача шера 3000 совгӀа къонабараш тӀаэцаргболча колледжашка.
ВорхӀ шера лаьрхӀа программа вӀашагӀъеллай цига дешареи Ӏилмани гӀулакхех йолча Министерствога гӀолла. Республикерча экономикан хьалага хьежжа хургда деррига. Тахан эггара чӀоагӀагӀа эшаш йола профессеш караерзаяьраш ба къаман эшараш, цудухьа цу оагӀонцарча дешара лакха терко ю вайцига. Экономикан хьал айдергдола, шоай болх дика ховш бола къахьегамхой ба эшараш.
