Халкъа Гуллама спикера нах тӀаийцар
ГӀалгӀайчен Халкъа Гуллама кулгалхочо, «ЦаӀ йола Росси» яхача парте моттигерча отделене секретара ТӀумхой Мухьмада нах тӀаийцар. Иштта нахаца кхетаче дӀайихьар «ЦаӀ йолча Россе» ПП РОП кулгалхочо Далганаькъан Розата, паччахьалкхен органий викалаша.
Цу кхетаче дийцар лоархӀаме дешаш, царна юкъе дар тишъеннача фусамех, лаьрххӀа йола тӀема операци дӀахьош болча доакъашхошта лаьтташ даларах, тишбенна тхов хувцарах дараш. Нах дагадоахкаш бар шоай фусамашкара хьалаш.
ХӀаранега ладийгӀачул тӀехьагӀа,ТӀумхой Мухьмада царна жоп делар, кастлуш уж хаттараш кхоачашде хьожаргба, лаьтта далара дош а тохкаргда, тхов хувцара дола хьал а мишта латт хьожаргва, аьлар спикера.
Пхьилекъонгий-Юрта вахархочо хоам бир, догӀаш делхача хана, ший цӀагӀа догӀа дийлхача каст-каста хий чудувларах, из бахьан долаш материальни зе а хул, вахара Ӏаткъаш дола. Из хаттар доаггӀача беса кхоачашдара декхар тӀадиллар ТӀумхой Мухьмада моттигерча администрацена.
«Бахархой раьза бар цу тайпара сиха шоай хаттараш тӀаэца а царна жоп дала а вӀаштӀехьадаларах», - аьлар ГӀалгӀай Республикан нах тӀаэцаш йолча моттиге.
