Буро кӀалхара ФОК кастта тоаяь яргья
Дукха хьийжа, сатийса хьалъеш йола БурокӀалхара ФОК тоаяь яла йоалл. Керттера балхаш чакхдаьха баьннаб болхлой. Из хоам «Сердало» газетага бир мехкарча Паччахьалкхен зарбан болх лелабераша. ДӀадахача шера дӀаболабир из боккха болх.
Карарча хана чура балхаш чакхдоахаш боахк болхлой, йӀовхал чуйиллай ФОКе. 1 200 кв метрага кхоачаш йолча зале линолеум, метташ Ӏодахка кийчлуш ба цига. Спортацара ловзараш дӀакхахьа, бокса лаьрхӀа доазош къоастадеш болх дӀабихьаб.
Цул совгӀа, аэробика лаьрхӀа къаьстта зал кийчъяьй ФОКе йиӀигашта. 60 саг цкъа тӀаэца йиш йолаш хургья ФОК. Юртара физкультурникаш шоай кийчон болх ишколашка, кхыйолча моттигашкарча ФОКашка дӀакхахьа безаш хул карарча хана, цунга хьежжа, керда ФОК царна доккха совгӀат да.
Белгалде деза, из беркате болх «Демографи» яхача къаман проекта «Спорт-вахара оамал» яхача программага гӀолла дӀахьош болга.
