«Тахан юртбоахама даькъ тӀа хьайоаккхача продукце дукхал лакха хилийтара, паччахьалкхено из хьаллоацаш ба. Цунна чудоагӀаш да, «Юртбоахам дегӀабоалабар, юртбоахама продукци йохкара моттигашкара кхача бохкара хьал тоадар» яха мехка программа кхоачашъеш хилар а», - аьлар ше къамаьл деш Келаматанаькъан Махьмуд-Ӏаьлас, яхаш, дийцар тхона цун зарбан болх лелабераша.

Иштта белгалдаккха лов, «АПК продукци экспорта яхьийтар», «Фермераш хьаллацар, юртбоахама коопераци дегӀайоалаяр» яха федеральни проекташа дакъа лоацаш хиларо дика моттиг дӀалоац цу балха юкъе.

Иштта дале а, цунна чудоагӀаш долча боахамаша теркам тӀабохийт экономически даькъ тӀа хила турлуш долча хувцамашта; уж да юртбоахама даькъ тӀа инвестицеш кӀезигагӀа юкъеяхар, арахеца даар эцараш кӀезигагӀа хилар. Цу юкъе дӀалоархӀаш да Ӏалама хьаоттамца хула хувцамаш, е АПК даькъ тӀа паччахьалкхено деш дола новкъостал юхадаккхар.

Юртбоахам дегӀабоалабара даькъе мехка боахамашта пайдане хилар массехк йоккхача инвестицей проекташ хилар а. Уж я томаташ арахецаш йола «Агрокомплекс «Шолже», ГӏалгӀайчен сомий беш «Сад-Гигант». Цигара 2023 шера 22 эзар тонн сом гулбе таро хилар, цар шоай балха овсаре, къахьегарах хьатӀабена пайда хилар 8-зза дукхагӀа», - аьлар Махьмуд-Ӏаьлас.

Цул совгӀа, дика дакъа юкъедахьаш хилар «Кантышевский» оала теплицаш лелаю моттиг, цо Ӏалашду мехка ше санна дола боахамаш, дӀаювш йолча баьцакомарий фу царна лоаттадеш.