Мехкара мах бара гӏулакх дикка тоалуш латт
Вай мехкара мах бара гӏулакх тикашка, базарашка, иштта кхыйолча моттигашка гӏолла дикка тоалуш латт. Из хоам «Сердалога» бир Мехкадаь зарбан болх лелабераша.
«Хӏама йохкара болх боаггӏача боараме дӏабодаш хилар вайна лоархӏаме да. Бахархошта аьттув хилийтара тӏехьа тикаш, базараш хьаеллаш, ийцача хӏамах ахча картаца дӏадала йиш хургйолаш, кхерамзлен хьал лорадеш къахьег тахан мехка. 2026-ча шера хӏама йохкарашта а эцарашта а паргӏато хулийташ дӏахо а дикка тоаде лерхӏ цу оагӏонца дувзаденнараш», - белгалдир вай мехкадас Келаматанаькъан Махьмуд-ӏаьлас.
Дӏадахача шера мах бара оагӏонца мехка хьахиннар 68,6 млрд ахча да, лурчагӏа хинначул 5,4% лакхагӏа да из. Цу гӏулакхо хьагойт йохкараш, эцараш дукхагӏа болга. Цу юкъе лоархӏаме дакъа дӏалоацаш я зӏамига, йоккха хӏама арахеца моттигаш, базараш, ярмаркаш, зӏамига, йоккха компанеш. Тахан мехка 2036 моттиг йола ворхӏ базар я, бархӏ ярмарка доазош да 715 моттиг йолаш, 150 моттиг я цхьацца хӏама йохка йиш йолаш.
Вай мехкарча юртбоахамера кхача бохкаш йола 20 ярмарка дӏайихьар дӏадахача шера - доккха гӏо хул цох АПК къахьегамхошта. Хӏамай маьхаш боарамал тӏехдаьнна хургдоацаш, чӏоагӏо я хӏама йохкача моттигашца оттаяь, эггара дукхагӏа наха ийеш йолча хӏамашта 10%-га кхоачаш мара мах тӏатоха йиш йоацаш. Мехкара хӏама йохка массехк йоккха моттиг я цу юкъе.
