Терроризма духьала къовсам лоаттабе безилга хьалхадоах вай студенташта
Наьсарерча политехнически колледже терроризм яхача зулама духьалара урок дӀайихьар мехках бохабаьча наьха мемориальни комплексе болх беш йолча Овшанаькъан Зарас. Иштта цига дакъа лоацаш вар терроризма духьале лоаттаеча комиссе доакъашхо Бакайнаькъан Ислам.
«Цу доккхача зулама духьала къовсам лоаттабе безилга, цох лорабала безилга хьалхадаьккхар къонабарашта. Интернете гӀолла из зулам доаржадерех лоралуш, моллагӀа тешаме доаца хӀама хоаделча Ӏаьдалга хоам бе безилга дийцар кхетаче. Иштта студенташта гойтар терроризм яхача зуламо толхадаьча вахарах йола видеороликаш», - дийцар «Сердалога» кхетаче дӀахьош хиннараша.
Къонача тӀехьенца иштта йола кхетаченаш дӀакхахьар чӀоагӀа лоархӀаме да тахан латтача хана, хӀана аьлча из бӀеха во дагакхоабараша шоай никъ интернета оагӀонашка гӀолла боаржабу; цудухьа кагирхошка даиман дӀадувца деза, тешаме боацача нахаца бувзаме ма дувла, яхаш. Студенташ раьза болаш, цар шоашта мел къувлаш хинна хаттараш доашхаш, дӀаяхар кхетаче.
