«Хам баь варгвоацаш, доккха къа да вай хьехархоша хьегар! Хьехархой хиларал совгӀа, цӀагӀара хьал массахана лакхача боараме лоаттаде гӀерта, эздий дезал кхебу, тӀаккха Даьхен бизза къонгаш, начӀал дола нах кхебеш къахьега нах ба уж. Тахан, вай турпалаш Росси лораеш латтача хана, геттара лоархӀаме да из гӀулакх. Берашта кхетам луш, уж нийсача наькъ тӀа боахаш хьабоагӀа беркате нах ба хьехархой!» - аьлар вай Мехкадас, хьехархошка къамаьл деш.

Республикан кулгалхочо белгалдир, дешара оагӀонца тӀехьарча шерашка дикка хувцамаш хиннилга. Хьалъяьй керда ишколаш, берий бешамаш, тишъеннараш тоаеш боккха болх дӀабихьаб. 2019-ча шергара 2023-ча шерга кхаччалца йолча хана, 23 эзар совгӀа долча берашта моттигаш луш йола 37 ишкол хьалъяьй мехка. Мехкадас теркалдечох, 3 700 наха болх бе моттиг Ӏалашъяьй цу гӀулакхо. Шоай болх бехктокхаме дӀахьош хьабоагӀача хьехархошта совгӀаташ делар Мехкадас. Царна юкъе бар дуккхача шерашка къахьегаш хьабоагӀараш, иштта къона хьехархой.