Гӏалгӏайчен къаман проекташ кассага гӏолла кхоачашъяра боарам 73% я
Яьржа кхетаче дӏахьош, проекта хьаеча фусама кулгалхочо Малсаганаькъан Бек-хана хоам бир, кассага гӏолла бола кхоачашъяра боарам 73, 18% хилар, юкъера мах дӏалаьрхӏача. Из гойтам дуккха а дикагӏа ба, дӏадахача шера хинначул.
Гӏалгӏай республикан Кулгалхочун, Паччахьалкхен зарбан болх лелабераша яхачох, бартчӏоагӏо яра хьал а лакха да -98%.
Къаьстта лакха толамаш да Гӏалгӏайчено гойтараш «Экологи», «Пайда луш йола яхьий экономика» яхача къаман проектех, уж кхоачашъяьй 100%. Иштта дика толамаш да «Кагирхой, бераш», «Вахара хьалаш», «Туризм» яхача проектий даькъ тӏа.
«Лоархӏаме да проекташ кхоачашъеш йолча моттигашта юкъе бувзам лелабар. Дика вӏашагӏбеллача балха мара таро хургьяц цу даькъ тӏа толамаш даха», - аьлар Келаматанаькъан Махьмуд-ӏаьлас.
Белгалду, республике хьатӏадоагӏача шера цхьайола проекташ кхоачашъе лаьрхӏад: керда наькъа 11 моттиг хьаяр, ишколаш цӏенхаштта тоаяр, ветераний Цӏа тоадар, юкъарлон 23 доазув тоадар, библиотекаш кердаяхар, ФАП, даькъ тӏара дарбанчеш хьалъяр.
