Яндарерча культуран Цӏагӏа дӏайихьар «Хьаи саи да ер Лаьтта» яха экологически оагӏонцара кхетаче
08.04.2026 09:17
Экологе Шера хетаяь кхетаче дӏаяхьа гулбелар Яндарерча культуран Цӏагӏа. Кхетачен кулгал деш хиннар яр исбахьален оагӏонцара болх дӏахьош йола Йовлой Мадина.
«Кхетачен доакъашхошта хьалхадаьккхар гонахьара ӏалам лораде дезилга, ӏалама моттигий хозал йоаяр харцахьа, зуламе долга. Йовлой Мадинас белгалдир, уж гӏулакхаш хӏара бераца, зӏамига долча хана денз, чӏоагӏде дезилга. Моттигера ӏалам лорадара тӏехьа, малагӏа болх боаржабе беза дийцар цига», - йоах «Сердалога» цу моттигера бенача хоамо.
Кхувш латтараша кхетаде деза, экологе хьал лорадар хӏара сага декхар долга. Бера хана ӏомадаьр, чӏоагӏдаьр массахана даха дус сагаца, цудухьа чӏоагӏа лоархӏаме да къонабарашца цу оагӏонцара кхетаченаш дӏакхахьар.
