ГӀалгӀайчен Лоаман кадетий корпусе, хих лорабала Ӏомабелар
Республикан МЧСа хин моттигашкарча кхерамзлен отдела инспектораша, укх деношка Лоаман кадетий корпусе занятеш дӀайихьар, уж дӀахьош кадеташта дийцар хи тӀа кхерамзле лелаяра керттерча бокъонех, яхаш, дийцар «Сердало» газетага ГӀалгӀай Республике гӀолла йолча Россе МЧС ГУ зарбан болх лелабераша.
Цу керттерча бокъонашта юкъедолхаш да: ца йовзача моттигашка наьк цадар; «лувча могадаьдац»; берда йистера, гаьна дӀачу ма гӀо; хи чу Ӏочувалалехь кӀалхарвоаккха гӀирс миштаб хьажа; хӀаьта массанена довзаш дола «наьк де ца хойя, хи чу ма вала».
Цул совгӀа, берашта дийцар, малагӀа нийса хьалаш леладе деза, хьайна уллуврвар хиво Ӏохьош хуле, иштта наьк деча хана малагӀа кӀалхарваккхара гӀирс лелабе беза.
«Наьк де ховш хилар, эггара чӀоагӀагӀа йола кхерамзлен Ӏалашо я, дика наьк де ховш вар а лоралуш хила веза хих. Кхетаде деза, наьк де йиш йолга лаьрххӀа цу гӀулакха йолча моттигашка», - аьлар БВО отдела инспектора ЦӀечой Адама.
Ӏомабалар йистедоалаш, кадетий корпуса Ӏомалуш болча доакъашхошта дӀаделар вахар лорадара а шоашта гонахьарча наха новкъостал дара а бола хоам тӀабола каьхаташ.
