Цхьоагӏон шерца лоархӏаме проекташ йоаржаергья Хьалхарбараша
Россе къамий Цхьоагӏон шерца мехкара Хьалхарбараш лоархӏаме проекташ йоаржаеш хургба. Цох лаьца дийцар мехкарча Паччахьаалкхенца «Хьалхарбарий Болам» яхача оагӏоно дӏайихьача кхетаче. Кхетачен кулгал деш хилар мехкарча Паччахьалкхен хьалха латта Сластенин Владимир.
Иштта видеобувзамга гӏолла дакъа лаьцар цу оагӏонцарча Департамента кулгал деча Негрова Ольгас. 2025-ча шера кхоачашдаьрех, дӏахьо кхоачашде лерхӏарех дийцар кхетаче. Республикерча «Хьалхарбарий Болам» яхача оагӏонна кулгал деча Албохчанаькъан Маринас дийцар дешархошца шоаш дӏаяхьа лерхӏача проектех.
«Тахан «Хьалхарбарий Болама» болх дикка чӏоагӏлуш латт мехка. Къаьстта йоккха терко е лерхӏ укх шера «Зарница 2.0» яхача, Даьхенцара безам чӏоагӏбарах долча тӏема ловзара, кагирхоша грантови яхьашка дакъа лацара, иштта Россе къамий Цхьоагӏон шера хетаяьча кхетаченашта», - белгалдир Сластенин Владимира.
