«ЖIайрахьа, Шолжа кхалешкарча лоамашка туристашта лаьрхIа керда моттиг кийчъеш я. Россе йоккха йоаца туризм дегIайоагIаш я, моттигерча Iаьдало шийна могар ду из дегIайоалаяра. ГIалгIайчен кулгалхочо Келаматанаькъан Махьмуд-Iаьлас тIадиллача декхарах, «САФМАР» оалача маьл хургбола гIулакхаш деча ганзо вIашагIъеллача проектах, Гуцаранаькъан Микаила дакъа а лоацаш, Эса-чIоже 20 зIамига цIа хьалдергда туристашта лаьрхIа» , — аьлар хоамо.
Республикан ЖIайрахьа кхале вахача хана, Келаматанаькъан Махьмуд-Iаьла, «САФМАР» ганза кулгалхо хьежар, наькъа арабаьнна леларашта лаьрхIа хьалдаьча зIамигача дийтта цIенга.

2023 шу чакхдалале, гIишлонхоша кхы а цу тайпара ялх цIа хьалдергда, туристашта лаьрхIа.

Келаматанаькъан Махьмуд-Iаьлас белгалдир, шийла хозагIа кхы йоацача моттиге туристашта салаIа цу тайпара хьал хилар дика да, аьнна.

Укхаза салоIаш хиннача цхьаццабараша, цу деша мах оттабаьб, цига салоIаш йола ха дIаяхьа туристаш йиш йолаш хилар, дика хеташ, хьаллоац. СалоIаш болча наха дикагIдола хьалаш хилийта деза.

Кастлуш эггара чIоагIагIа наха салоIаш йола ахкан ха дIайолалу, туристаш дукхагIа хургба, вай уж тIаэцара кийча хила деза. Цо тешал ду вай салоIача наха дола хьалаш кхоллаш хилара», — аьлар ГIалгIай Республикан Кулгалхочо.

Хьалдеш дола кемпингови оала зIамига цIалгаш, цIи ялара кхерам болаш а дац. Хьалдеш а цу цIалгашта дIайохийташ а яр Iалама бийдал я: аьшк, дахча, кхера. Гаьна доаццаш санитарни хьалий доазув а да, хьаIайна нувхаш сиха дIаяхьа таро я. СалоIаш болча наьха аьттув ба еррига шоай машенаш Iооттае, бийса яккха совца, чам болаш дола даар даа, безаме ха дIаяхьа.

ХьалхагIа ГIалгIай Республикан Кулгалхочо цох лаьца цкъа белгалдаь Iийнадац, туризм дегIайоалаяра, иштта республикан хьачуйоагIаш йола налог дукхагIа хилийтара мел эшар долаш да, аьнна. Цул совгIа, из дегIаяро таро лу бюджета тIабоагIа пайда совбаккха, наха балха моттигаш хилийта.