Цецвоаккхаш йола ганз кораяьй «АСМ Групп» тоабанна чубоагӀача говзанчашта, кхашкара тохкама балхаш дӀахьош ТӀумагӀа яха архитектурни гӀишлош йолчара. Из моттиг ГӀалгӀайчен лоаман даькъ тӀа я, гӀалгӀай бӀаьшерен тамашийнача архитектурах цаӀ лоархӀаш а я.

«Таханарча денга хьакхаьча дола, цу ханашка шей оалаш леладаь хинна ахча да Дошо Орда хиннача ханашта чудоагӀаш, из я хьалхарча бӀаьшерен эггара низ болаш хинна импери. Цу хана хӀанзарча Россе а Юхерча Малхбоален а доазон тӀа дахаш хиннача халкъашта юкъера экономически, культуран бувзамаш леладаь хилара тешал деш да из.

Вай музей къахьегаш я мехка исторе, культуран тӀехьале лораяра, иштта цу тайпарча мах болча хӀамашца цун ганз хьалйизара. Цудухьа цу тайпарча моттиго къаьстта лоархӀаме берзабу музея болх. Цул совгӀа, из тӀехьален ганз кораяро хьагойт «АСМ Группанна» чубоагӀача говзанчаша шоай болх лерттӀа дӀахьош хилар; исторически Ӏилма, мехктохкам дегӀабоалабара цар юкъедахьар доккха дакъа хилар», - аьлар «Сердало» газетага ГӀалгӀайчен мехктохкама музея кулгалхочо Саганаькъан Мухьмада.

Говзанчашта корадаь цӀаста пхиъ, дото цхьайтта шей да Дошо Ордай ханара, цар йоккха терко тӀаоз. Уж чудоагӀаш да Узбек, Хаджи, Тохтамыш кулгалдеш хиннача ханашта.

Белгалдоаккх, хьалхагӀа ГӀалгӀайчен лоамашка корадаьд Султан Мурад ӀӀӀ кулгалдеш хиннача ханара шей, из хиннав цӀихезача Сулейман Великолепни оалачун виӀий-воӀ.

Шей арахийцад 1574-1575 шерашка, из корадир Цхьоре чухаьрца лаьтта маьлхара кашамаш цӀендеча хана.

ХӀанз кораяьча ганзо хьагойт, ГӀалгӀай мехкарча археологически тохкамаша кхы а кердачунга кхоачавергхилар, вай мехка дӀаяхача ханара довзанза дисараш дӀахо а доаржадеш.