Инвестицей болх боаржабу вай лоаман даькъ тӏа
«Жӏайрахь» яха индустриальни парк хьалъе болалуш ба мехка. Из хоам «Сердалога» бир мехкадаь зарбан болх лелабераша.
«Жӏайрахь» яха парк хьалъяр мехкара промышленни оагӏонцара хьал тоадеш хургда, иштта экономикаца дувзаденнараш дикка айдеш хургда из гӏулакх. Геттара лоархӏаме да инвестиционни проекташ лоаман моттигашка йоаржаяр», - белгалдир вай мехкадас Келаматанаькъан Махьмуд-ӏаьлас.
Промышленность меттаярга хьежжа, хьаотташ болх ба из. Жӏайрахьа кхале 10,3 га доазон тӏа хургья из парк. ООО «Кавдоломит» яха компани я болх дӏахьор. Цига инвенстиционни проекташ йоаржае ловш барашца бартчӏоагӏам оттабу болх дӏахьош ба тахан.
Укхаза арахецаш хургба гӏишлон балхашца эшаш бола доломит йоалла бекъа маркхал, юртбоахама моттигашта эшаш дола доломита хьоар, минеральни боамби, декоротивни кхера, гӏашлой наькъаш дехка плитка, тайп-тайпара бола жагӏа, иштта хьастара хий шушашка детта болх бергба. Цул совгӏа, 50 совгӏа бахархошта болх бе керда моттигаш хургья укхаза.
Белгалде деза, лоаман моттигашка из геттара лоархӏаме долга. Мехка кулгалхоша йоккха терко лоаттаю индустриальни паркашта, уж хьалъе инвестораш тӏаозаш.
