Кхо эзар совгӀа каьхат да, вай Паччахьалкхен архиве ах шера хьачуденар
Массаза цига дадаргдола, кхо эзар совгӀа каьхаташ хьачудаьхкад Госархиве укх ах шера. Из хоам тхога бир мехкадаь зарбан болх лелабераша. Бахархошта, цхьацца моттигашта эшаш дола каьхаташ, справкаш дӀателаш бувзам лоаттабу архиво. Укх ах шера 1600 совгӀа дехар техкад, 1850 каьхатий копеш, сурташ, иштта кхыдараш дӀаденнад. Архива болхлоша Ӏилман-методически оагӀонцара гӀо лоаттаду тохкамхошта, студенташта.
«Истореца дувзаденнараш лорадарца чӀоагӀдеш да къаман кхоанарча, таханарча вахара хӀама. ТӀехьенашта юкъерча бувзама керттера оагӀув ба из, цудухьа архивистий болх массахана лоархӀаме, бехктокхаме хиннаб», - белгалдир вай мехкадас Келаматанаькъан Махьмуд-Ӏаьлас.
Укх шера мехка дӀайихьар «ГӀалгӀайчен йоазув: нахи хаи» яха историко-документальни проект. Вай къаман юкъе цӀихеза хиннача наьха цӀераш дагалоаттаярца ювзаенна я из проект. Иштта республико дакъа лоац мехкарча юкъара-политически оагӀонцарча балха доакъашхой къахьегамах йолча халкъашта юкъерча тохкама проекте.
ДӀахойодача хана, архиверча каьхаташта юкъе таьрахьашца дувзаденнараш юкъедаха лаьрхӀа ба мехка. Дайна хӀама хьалохаш йола электронни архив хьакхолла, архива ганзашта кхоачам лоаттабеча моттигашцара бувзам чӀоагӀбе лерхӀ мехка.
