Инаркъе хьайийллар керда ши ишкол
ГӀалгӀайчен кулгалхочо Келаматанаькъан Махьмуд-Ӏаьлас дакъа лаьцар; Инаркъе 540,720 моттига лаьрхӀа йола ши ишкол хьаеллача. Кулгалхочун зарбан болх лелабераша яхачох, уж ши ишкол хьаелларах, бераш шин сменах дешаш хиларца ювзаенна халонаш дӀаяьлар цу юрта.
«Укхаза вай берашта дешара моттигаш мел эшаш долча хьалаца Ӏалашъяьй; сийрда, йоккхий кабинеташ, библиотека, столови, актови зал, спортивни зал, кхы дукха хьалаш да»,-язду ший телеграм-канале Келаматанаькъан Махьмуд-Ӏаьлас.
Цун зарбан болх лелабераша иштта дийцар, цхьан ишколанна цӀихезача юкъарча болхлочун, дӀадахача бӀаьшерашка Инаркъерча хьалхарча ишколе кулгалхо хиннача, Ӏилма дийшача сага Кхоартой Ӏалий цӀи елар.
ХӀанз укх юрта болх беш я йиъ ишкол. Республикан Кулгалхочо декхар тӀадиллад, мехка массайолча ишколашкара шин сменах дола дешар соцаде, аьнна.
ХьалхагӀа мехка Кулгалхочо декхар тӀадилладар, лайчилла бетта еррига дешара моттигаш хьаелла, аьнна.
