«ХӀарон тамашийна саг ва, могашал ший тайпара чӀоагӀа хиларах, ше лаьрхӀачунга кхача вӀаштӀехьадоал цун. Цхьан моттиго хьагойт, Даьхе езаро, цун истори ховш хиларо, моллагӀа йола халонаш тӀехьаюташ хилар», - аьлар «Сердало» газетага ИнгГУ зарбан болх лелабераша.

ХӀарон деша ваьгӀав Москве, психолога болх Ӏомабеш. Франце дарба деш волаш, цига таржам дара болх нийслу цунна. Россел арахьа волаш дика отт цун вахар, бакъда, хьамсара мохк дагара ца боалаш, юхавоагӀа из. ГӀалгӀай мехка цӀавеначул тӀехьагӀа, ший дешар дӀаходахьа лоархӀ цо, ИнгГУ филологически факультете каьхаташ чулу. Из чӀоагӀа лаьрхӀа ва французий мотт Ӏомабе, из академически кӀийлен тӀа бовза.

«Тха университете заӀапхой хьаллоацаш йола программа я. Цу наха, вахара халонаш тӀехьаюташ хиларал совгӀа, кхычарна а шоашкара масал гойт», - аьлар ГӀалгӀайчен керттерча вуза зарбан болх лелабераша.