«Дукхача къамий Кавказ» яха ӏилман конференци дӏайихьар ИнгГУ
Гӏалгӏай паччахьалкхен университете, Кавказ тохкараш гуллуш кхетаче хилар. ӏV Къамашта юкъера «Дукхача къамий Кавказ. Къилбаседа Кавказа археологи, истори» яха ӏилман конференци дӏайихьар цига. Цунна юкъе дакъа лаца баьхкабар тайп-тайпарча моттигашкара археологаш, историкаш, этнографаш, лингвисташ. Республикан культуран-исторически тӏехьаленах дувцаш бар гулбеннараш.
«Кавказа истори мел дӏаьхий, доккха да белгалдир цига. Тайп-тайпарча оагӏонашта тӏатовжаш докладаш йийшар ӏилманхоша. Цу юкъе дар цӏихезача кобански культураца дувзаденнараш, аланой хӏама дегӏадара никъ, иштта мехкарча гӏалай юртий истори. XX-ча бӏаьшере Гӏалгӏайчен хӏама тоадалара гӏулакхех, иштта ерригача Къилбаседа Кавказаца дувзаденнарех дийцар цига боккхача говзанчаша», - йоах «Сердалога» бенача хоамо.
Итташ долча къамий истори дувзалуш, юкъера бувзам гойташ йола моттиг я тахан Къилбаседа Кавказ. Кхетачен доакъашхоша белгалдир, ӏилманхоша цхьана болх дӏабахьарца дӏаяхача ханашцара хӏама дийндергхилар, лар йойтаргцахилар.
Духхьал докладаш йийша ӏанзар цига гулбеннараш, дийнача къамаьлаца цхьаццадараш доашхаш дӏаяхар кхетаче. Кхоана йоаржае лерхӏача лоархӏамеча проекташка накъадаргдараш а белгалдир цига. Вӏаший бувзам хилча моллагӏа хӏама тахка, къоастаде аттагӏа хилар теркалдир цар. Белгалде деза, иштта йолча конференцешка гӏолла боккха пайда боаржабе йиш йолга. ӏилман къахьегамах бола гуллам арахеца лаьрхӏар гулбеннараша.
