94% мехка лочкъаяь ток криптовалюта майнингаца бувзам болаш я
177 моттиг я мехка ток лочкъаяь гучаяьккхараш; 37,5 млн киловатт-сахьат да «Къилбаседа Кавказа Россетий» - «Ингушэнерго» филиала болхлоша тохкама болх дӀабихьа гучадаьккхараш, 2025-гӀа шу доладелча денз. Ахчанга диллача, тока оагӀон моттига даь зе 356 млн сомага кхоачаш да.
94%-га кхоачаш йола ток - 35,4 млн киловатт-сахьат ахчанга диллача, 347,5 млн сом бокъо йоацаш лелаеча майнинг-фермашта тӀалатташ да. Из болх гучабаьлар Наьсаре, Илдарха-ГӀалий тӀа, Шолжа-Шахьаре, ТӀой-Юрта. Из бокъо йоаца болх лелабаьчаргара хьадаьхараш 450 цу оагӀонцара гӀирсаш да.
«Майнинг – ток лечкъаяр доккха зе да тока оагӀон моттигашта. Криптовалюта даккха аьнна леладеча гӀулакхо тока оагӀонцара болх кегабу. БоаггӀача боараме ток дӀа-хьа кхачац бахархошта, тока низ лоха хул; цӀаьхха, дӀайов, - белгалдир «Ингушэнерго» филиала кулгалхочун декхараш кхоачашдеш волча Котаганаькъан Кемрана. – Тока оагӀонцарча болхлоша, Ӏаьдало, иштта массабараша теркалде дезаш во гӀулакх да из. Цхьана болх дӀабахьарца мара тоалургдац вайна тока оагӀонцара хьал».
Бокъо йоацача тайпара ток йоаерашта духьала къовсам лоаттабу мехка тахан. Рейдаш дӀакхухьаш, бахархошца къамаьл деш тоабе гӀерт из болх тока оагӀон болхлой. Ток лечкъаеш йола моттиг шоашта хоаелча, даим болх беча укх номерах телефон дӀатоха еза: 8 800 220 0220 (24 сахьата, мах боацаш, телефон хьатехар къайлахьоргва).
Белгалде деза, Росси Паччахьалкхено, 2025-ча шерарча Наджгоанцхой бетта 1-ча дийнахьа денз 2031-ча шерарча тушола бетта 15-ча денга кхаччалца, мехкарча 10 моттига майнингацара болх бийхкаб, вай республика а я цу юкъе.
