Гуйран кхашкара балхаш дӏадоладергда, цхьа бутт баьлча
Хьатӏабоагӏача бетта 10-ча дийнахьа дӏадоладе лерхӏача кхаш тӏарча балхаша 25 эзар гектар совгӏа юртбоахама лаьтташ дӏалоацаргда. Таханарча дийнахьа кийчо еш ба ахархой, 30%-га кхоачаш бола цу оагӏонцара кийчон болх чакхбаьккхаб цар. Кхашка дӏадахьа дезача балхий боарам мел хила беза чӏоагӏдеш ба, юртбоахама гӏулакхех йолча министерстве. Тахан эшар да 5 000 совгӏа тонн гурахьа дувш дола ялат, 6 000 совгӏа из дикагӏа хьахургдолаш тохаш бола кхоачам, 50 тонн совгӏа молхаш, 4 000 тонн болх беча тракторашта, машинашта эшаш дола доагор. 1 300 машинаш я бӏаьстанара, гуйранара балхаш дӏадахьа арайоахаргьяраш. Вай мехкадас Келаматанаькъан Махьмуд-ӏаьлас белгалдечох, из беррига болх вайна беркат дахьаш хургба, Дала аьннадале.
«Дӏадахача шера, хаоттам ма хетта хиннабеце а, 45 эзар тонн совгӏа ялат чуийцар кхаш тӏара. Юртбоахама 148 моттиге ялат кӏалдусаш хӏама эттар, хӏаьта а Даьла низаца дикка ялат чуэца аьттув баьлар вай», - теркалдир Мехкадас. Эггара хьалха 23 эзар гектар яр ялата лаьрхӏар, бакъда цу оагӏонцарча министерствос 25 эзарне тӏа соцадир из гӏулакх. Иштта укх шера комсаш, кхыйола хӏама дӏайогӏаш болх дӏаболабе лерхӏ мехка.
