Илдарха-ГӀалан 11-тта АЗС кхоачамбоацараш гучадаьлар

Илдарха-ГӀалан прокуратуро гучадаьхар 11-тта заправке цӀера кхерамзленна Ӏалашо яь цахилар, яхаш, дийцар «Сердало» газетага тӀахьожам дӀахьош хиннараша.
«Илдарха-ГӀалан прокуратуро кхерамзленна Ӏалашо яьйий хара тӀахьожама болх дӀабихьар, Илдарха-ГӀалий тӀарча доагор чудеттача станцешка», - аьлар хоамо.
Белгалдир, цхьайолча АЗС даькъош тӀа цӀи ялара кхерамзленна Ӏалашо янза болх дӀахьош хилар. Иштта «РН-Ингушнефтепродукт» ООО, «Орстхо» ООО, «Профнефть» ООО, «Кацторг» ООО, «Стройинвесткапитал» ООО, иштта кхы а шин предпринимателга, цу тайпара 11-тта заправочни станце, лоралуш хилар хьалхадоаккхаш дола каьхаташ дацар: «Эккхара кхерам ба», «ЦӀерах лорале», «ГӀаьле ма оза» яха йоазон белгалонаш гуш яцар.
Иштта цӀерах лоравалара де дезар хьалхадоаккхаш белгало а яцар, цӀи яьлча хьалхарча аргӀагӀа де дезар гуш дацар учёта журналаш тӀа.
Кулгалхой чакхбаьннабацар цӀера кхерамзлен Ӏалашо ярах, цӀера духьалара кхоачам баьбацар, цхьадола цӀи йоаяра лаьрхӀа гӀирсаш ха чакхъяьнна дар.
Белгалду, цу тайпара кхоачамбоацараш хиларо, наьха бокъонаш, могашал телхаю, нагахьа цӀи яьнна моттиг хуле, е кхыдола чоалхане хьал отте, доалахьардар а доацаш вусаргва.
Цу тайпара баьча балха прокурора юридически, гӀулакхерча наха духьала 12 гӀулакх хьадийллар, административни бокъонаш телхаяь хиларах. Прокурора лоткъамаш а оттадаь, из гӀулакх дӀахо тохкаргдолаш дӀадахьийтар ГӀалгӀай Республике гӀолла йолча ЖӀайрахьа, Шолжа кхалений МЧС ГУ, Илдарха-ГӀалан ОНДПР.