Шолжа кхалера ЛЭП кердаяккхара дӀадохьийт 41 млн. сом

ЭнергогIишлош Ӏалашъю токаца йиъ лоаман юрта – Галашка, Мужеча, Оалкама, ДаьттагIа; цига вах 3,7 эзар саг, иштта цига я 11 вахаре  лоархӀам бола  моттиг.

Из тока оагӀув юкъеяьккхай 50 шу хьалха, геттара тиша я  из хӀанз.  Цул совгӀа, цу тока гӀишлон тӀа тӀабода тока саьрг 1970 шерашка бахийта ба, цу хана ток башха дукха дӀаоза езаш а  яцар. Бакъда тӀеххьарча хана нах дукхагӀа тӀекхеташ, баха Ӏоховшаш хиларах, берзанча тока саьрга низ тоъаш бац.

Цхьаькха хаттар да: цу объекта дакъа да 1,5 километр, листача хьунагӀа гӀолла  дӀахьош, чӀоагӀа мух баьлча  гаьнаш  ӏотIалийге, цох зуламаш доал.

Хӏанз кердадаха лерхӀ  153 тишденна бӀоагӀий, 16 км къаьнара саьргаш хувцаргда (СИП). Хувцаш бола  тока саьрг кхераме бац, из юкъе баккхарах, энергетикий таро я массехк моттиг цунца цхьана кхоачашъе. Технически балха плана чудоагӀаш да 1 625 тишденна, дукха лаьтта дола  «пелаш» хувцар.

Проект кхоачашъеш, ЛЭП цхьацца йола моттигаш, халагIа йолчара аттагIа йолча сехьаяха лерхӀ», - аьлар «Ингушэнерго» филиала кулгалхочо Котаганаькъан Кимрана. - Цунга хьежжа  цу балхо таро лургья  цу юрташка токаца Ӏалашо яра болх аттача баккха, цун дикал лакха хилийта. Из болх йистебаргба ер шу чакхдоалаш.