Юрташка болх бергбола культуран оагӀонцара ши болхло белгалваьв
«Юртара культуран оагӀонцара болхло» яхача программан юкъе дакъа лаьцар вай мехко укх шера эггара хьалха. Алхастерча, Мужечарча культуран цӀеношка болх бергбола ши саг къоаставир цу юкъе. Из хоам «Сердалога» бир Мехкадаь зарбан болх лелабераша.
Шинна болхлочо цхьацца миллион ахча эцаргда цу проектага гӀолла.
«Иштта йолча проекташа- «Юртара лор», «Юртара хьехархо» - дикка пайда боаржабелга бӀаргадайнад вайна юрташкарча моттигашка болхлой тӀаозаш. ХӀанз из аьттув ба культуран оагӀонца къахьегарий а», - белгалдир вай Мехкадас Келаматанаькъан Махьмуд-Ӏаьлас.
Зарбан болх лелабераша яхачох, культуран оагӀонца дувзаденнараш мехка хьаллацар лоархӀамеча декхарех да тахан. 2019-ча шера денз, «Культура» яхача къаман проектага гӀолла хьалдаьраш, тоадаьраш 24 культуран цӀа да.
Иштта Магасе хьалъеш латт Хамхой Ахьмада цӀерах йолча Паччахьалкхен филармоне хургйола фусам.
