Суртанчан 85 шу дизара хетабаь гойтам
ГӀалгӀайчен исбахьален искусствон Паччахьалкхен музее хьабийллар, республикан халкъа суртанчан, Россе Халкъашта юкъерча исбахьален искусствон, ЮНЕСКОнна чуйоагӀача ассоциаце доакъашхочун, Ӏоакъингах хӀамаш еча пхьара Батайнаькъан Заьудина «Басара гермеи Ӏоакъингеи низ» яха гойтам. Дукха ха йоацаш, цу начӀал долча суртанча 85 шу дизар.
«Ше ваь из цӀай цо дездир профессега хьежжа, «Басара гермеи Ӏоакъингеи низ» яха гойтам вай музее хьабелларца. Ший тайпара хозал хьакхолла, шийна гонахьарбараш гӀадбига Ӏемача суртанчанна, из ди кхы а лоархӀамегӀа да.
Кхоллам кхоачалуш бац яхача дешах тарра, из ха яьнна суртанча цунна дола боккъонца тешал да, искусство ха йолаш цахилара.
ХӀара бос, цо дуллаш дола хӀара сурт - из вӀалла а цахадаш дола кхоллама хьинар да, шераш дӀадахадар аьнна а кхоачалуш дац из, кхы а чӀоагӀагӀа мах болаш хиле мара», - аьлар «Сердало» газетага ГӀалгӀайчен исбахьален искусствон Паччахьалкхен музея кулгалхочо ТӀумхой Любас.
Ший лаьрххӀа болча гойтаме говзанчас гойта оттадаьрех дар тайп-тайпарча жанрах дола 25 сурт; уж дувзаденна да Ӏалама хозалца, наьха сурташца, вахара кхыча моттигашца.
Тешшаме ала йиш я - из гойтамГӀалгӀайчен культуран вахара сийрда оагӀув я. Цо дукхача наьха терко тӀаэзар, хоза хеташ хьежар говзанчас дехкача сурташка, цун начӀала мах оттабеш.
Гойтам кхы а массехк дийнахьа хургба; массане таро я Батайнаькъан Заьудина кхолламга хьажа.
