Гӏалгӏайче моартол хьайийллар, цӏихезача лётчика Осканаькъан Сулумбика хетаяь
Гӏалгӏайчен Шолже, Россе хьалхарча Турпалхочун, авиаце инарал-майора Осканаькъан Сосаркъий Сулумбика сийна хьадийллар керда дагалоаттама улг. Гӏалгӏайчен кулгалхочо Келаматанаькъан Махьмуд-Ӏаьлас дакъа лоацаш, кхетаче хилар цӏихезача лётчика цӏи лелаеча майдан тӏа.
Шахьаре дӏахьош хиннача кхетачене дагадехар Осканаькъанчунна карагӏдаьнна денал - хало тӏакхаьчача, юрта баьха нах кӏалхарбоахаш, цо ший са кӏалъоттадар. Из де могаргдацар денал долча, эпсара сий лорадеча, тӏема декхара мутӏахьа волча сага мара.
«Вайна лоархӏаме да вай мехкахой Даьхен гӏулакх дара ӏадат лорадеш хилар. Тахан Гӏалгӏайчен къонгаш шоай декхар дизза кхоачашдеш ба, лаьрххӏа йола тӏема операци дӏахьоча. Российски Федераце Турпал яха лакха цӏи лелаеш ва вай пхиъ мехкахо, царех кхоъ Шолжаера бахархой ба - Хьоашаланаькъан Адама Султан, Хьоашаланаькъан Ювсапа Султан, Тӏумхой Руслана Хьасан. Керда сийленг хургда тайп-тайпарча ханашка хиннача турпалхоех бола дагалоаттам биц ца болийташ. Из шоай вахар Даьхе бахьан, наьха сийрда кхоане бахьан дӏаденнача турпалхой сий деш хургда», - аьлар Келаматанаькъан Махьмуд-Ӏаьлас.
Гӏалгӏайчен Кулгалхочо доккха баркал аьлар уж къонгаш кхебаьрашта. Иштта цо къаьстта баркал аьлар из сийленг хьакхоллаш дакъа лаьцарашта.
