«Сердало» газета хьалхарча редактора 130 шу дизар дездеш ба республике
«Сердало» газета хьалхара редактор хиннача, латиний оагӀонца гӀалгӀай алфавит хьакхеллача воккхача Ӏилманхочун, юкъара гӀулакх леладаьча болхлочун, гӀалгӀай къаман вахаре дуккха дикаш доаржадаьча Малсаганаькъан Кураза Зоврбика 130 шу дуз тахан.
«ГӀалгӀай къаман цӀаккха вицлургвоаца саг ва из! Ӏилман, культуран оагӀон вахаре; мах баь варгвоаца боккха пайда битарех ва. 1894-ча шера ахкан хьалхарча бетта 3-ча дийнахьа паччахьа эскара полковник хиннача сага дезале, Темир-Хан-Шуре(таханара Буйнакск) яхача селий шахьаре ваьв Зоврбик. Благовещенскера юкъера ишкол яьккха, лакхерча дешара юхьиг йовзаш Петрограде деш цо», - белгалду Миннацерча хоамо.
Ма дарра аьлча, чӀоагӀа дукха къахьийгарех, кӀеж йоахача вахара деноех чакхваьннарех ва из воккха Ӏилманхо. КӀайгвардейцашца баьча тӀема доакъашхо хиннав из, Горски республикан дешара халкъа комиссар хиннав, 1923-ча шера бӀаьстан тӀехьарча бетта 1-ча дийнахьа арадаьнна, таханарча денга кхаччалца къаман вахаре дахаш дола «Сердало» газет хьакхелла, цун керте лаьттав.
Белгалде деза, къаман литературе цо махи хами баь варгвоаца доккха дакъа юкъеденилга. Эггара хьалха ГӀалгӀай, тӀаккха исторехи, меттахи, литературахи йолча Нохч-ГӀалгӀай Ӏилман-тохкама института кулгал деш хиннав. Къилбаседа Кавказерча хьехархой института доцент, Керттерча мехктохкама оагӀон доакъашхо-корреспондент, РСФСР къамий лоаттам тахкарах йолча СССР Ӏилман Академе комиссе доакъашхо хиннав Малсаганаькъан Зоврбик.
Теша лов, цун бӀаьхий хиннача вахара наькъах цкъа кино доаккхаргхиларах. Кураза Зоврбик кӀоарга хьаькъал долаш, къамах дог лазаш, ший мел бола низ гӀалгӀай къаман вахар, цун истори, культура, мотт дегӀабоалабе гӀерташ Ӏобилла саг ва. Иштта болча къонгий цӀераш еза, боча, хьамсара йолаш яхаргья!
