Ворхӏ къаман проекта ахчанцарча болх дика дӏабодилга белгалдир мехка
Россе рузкъан гӏулакхех йолча министерстве белгалдечох, вай мехкарча ворхӏ къаман проектацара болх юкъерча боарамал лакхагӏа дӏахьош ба тахан. Из хоам «Сердалога» бир Мехкадаь зарбан болх лелабераша.
«Пайда беш, дикка яржаш йола экономика» яхача къаман проектага гӏолла болх дӏабахьар тахан 100%-га кхоачаш да вай мехка, Россе цу оагӏонцара боарам 78,3% тӏа латтача хана. «Экологи» яхача проектацара болх а 100%-га кхоачаш ба (мехка - 43,6%). «Дезал», «Кагирхойи бераши» яхача проекташцара болх кхоачашбеча а дикка толам ба ала мегаргда тахан: 65,2%, 67,5%.
Ерригача Россе цу оагӏонцарча балхал кӏеззига лакхагӏа. Иштта дикка белгала я «Вахарера моттигаш тоаяр», «Дӏаьха, кадай вахар», «Туризм» яха проекташ. Вай мехкадас Келаматанаькъан Махьмуд-ӏаьлас белгалдир, къаман проекташцара болх РФ Президента лакха тӏахьожам лоаттабеш дӏахьош болга.
«Путин Владимир эггара хьалхарча оагӏонца Россе бахача наьха вахара хьал тоаде гӏерт. Къаман проекташка гӏолла керда гӏишлош хьалъеш, кхыдола доккхий балхаш кхоачашдеш, наьха вахар аттача доаккх», - аьлар вай мехкадас.
Келаматанаькъан Махьмуд-ӏаьлас хьакимашта тӏадиллар, къаман проекташка гӏолла дӏахьош болча балха йоккха терко лоаттае, аьнна, деррига балхаш йиллача хана, боаггӏача боараме кхоачашдаь хила дезаш долга белгалдеш.
