«ГӀалгӀай къаман культуранна, исторена юкъе доккха дакъа лаьцача, музей хьакхеллача, Сийлахь-боккхача тӀема ветерана Хьажамоахий Тухана карагӀдаьннар дийцар цига.

Кхетаче дӀахьош, цунна дукха дезаш хинна «ГӀарагӀураш» яха илли аьлар, иштта Хамхой Вахас цунна хетаяь хинна байташ йийшар», - йоах хоамо.

Дукхача шерашка къахьегаш хьавенача Малсаганаькъан Тухана карадерзадир тайп-тайпара балхаш. Парте Пригородни райкома хьалхара секретарь вар из, республикан промышленноста комиссар а вар, Наьсарен мехкдаьттан база директор а хилар.

Даим ше тӀахила везача балхашка хьежжа доацаш, цо дукха гулдора тӀема хоамаш, цига дакъа лоацаш хинна гӀалгӀай къаман бӀухой тохкаш а хулар из, тӀема мугӀарашка латташ, де доацаш бейнарий цӀераш гучаяха аьттув баьлар цун.

Беза хьаьший болаш, кхетаче хилар къамаьл деш Хьажамоахий Тухана мехкарий: Малсаганаькъан Тамара, Алла; Нохч-ГӀалгӀайчен мехктохкама юкъарча музея ветеран Ведажанаькъан Тамара, Наьсарен политехнически колледжа кулгалхочун гӀонча, Малсаганаькъан Тухана йиӀий-йоӀ, Пхьарчанаькъан Аьсет, иштта кхы а дуккхабараш.

Кхетаче йистейоалаш, хьаьшаша лаьрххӀача кӀопилга чу советски а хӀанзарча а ханара ахчаш чутайсар, «Баркал оалача нахагара, дийнача дагалоаттама» болама чудоагӀаш, советски халкъа карагӀдаьннар дагалоаттадара лаьрхӀа дар из.