ГӏалгӀай мехка белгалдир, терроризмаца къовсам лоаттабара тӀехьа барт кхета Ди
Наьсар-Кертерча Дагалоаттама, Сийлен мемориале дагалоаттама болам дӀабихьар, из хетабаь бар терроризмаца къовсам лоаттабе чӀоагӀо яьча Денна. Кхетаче гулбелар Ӏаьдала викалаш, юкъара балха моттигаш, СВО доакъашхой, волонтёраш, иштта моттигера бахархой.
ГӏалгӀайчен кулгалхочо Келаматанаькъан Махьмуд-Ӏаьлас гулбеннарашта хьалхашка къамаьл деш хьалхадаьккхар 2004 шера аьтинга бетта 22-ча дийнахьа хинна хатар.
«2004 шу. Со хилар укхаза 2007 шерга кхаччалца, из деррига сайна бӀаргадайна а ва со. Бакъда цу хана, мел хала дале а, вайна мегар цунна духьалъотта. Дуккхабараш бейра, бераш даьй боацаш дисар, даьй къонгаш боацаш бисар. Баркал ала лов сона тахан машар лорабеш ха тӀа латтарашта. Кагийча наха сий долаш, деналца лораду вай доазув - из хиннар кхы юхацадайтара, юкъарло паргӀата яхийтара», - аьлар Мехкадас.
Веза хьаьша хилар «Турпалхочун никъ» яхача мехка программан доакъашхо волча Къоастой Ахьмадах, цо хьоахадир ГӏалгӀайчен, иштта берригача мехка цхьоагӀо, машар лорабар лоархӀаме долга.
«Терроризмо шийца бала, лазар дахь. Цхьана мара вай таро хургьяц цу зулама духьалаъотта», - аьлар цо.
Кхетаче дӀахьош, Даим йоагача цӀера юхе зизаш даьхкар.
