Россе Паччахьалкхен байракха Ди дездергда вай мехка
Укх маьцхали бетта 22-ча дийнахьа Россе Паччахьалкхен байракха Ди дездеш, кхетаче хургья вай мехка. Мехкадаь зарбан болх лелабераша белгалдечох, Магасерча Барта -ГӀалан лакхе Россе байракх йогӀаргья. Цу дийнахьа йоккха культуран оагӀонцара программа йоаржаергья бахархошта, хьаьшашта лаьрхӀа.
Цу юкъе хургья викторинаш, боламаш, берий суртий яхьаш, гойтама балхаш, иштта кхыдараш а
Вай мехкадас Келаматанаькъан Махьмуд-Ӏаьлас белгалдир, Россе Паччахьалкхен байракхаца дувзаденна ди вайна массанена лоархӀаме долга.
«Магаса юкъе латтача Барта-ГӀалан лакхе Россе Паччахьалкхен байракх айяр Даьхенцара лерхӀам боккха болга да. Массайолча моттигашка, цӀайшкара хьаволавенна спорта яхьашка кхаччалца, вай аьттонца никъ дӀабахьар белгалдеш, лакха айяь хул байракх», - белгалдир республикан кулгалхочо.
Цул совгӀа, укх беттарча 20-ча денгара 22-ча денга кхаччалца паччахьалкхен, къаман политиках йола семинар дӀахьош хургба ИнгГУ. Ломоносов М.В. цӀерах йолча МГУ, къамий гӀулакхех йолча федеральни агенствон болхлоша хьаллоацаш дӀахьош я семинар. Цига хургья лекцеш, мехкарча боккхача Ӏилманхой гойтама балхаш, иштта кхыдараш.
