ЕГЭ дӀалу керттера хаи цох хьахиннари
Укх шера вай мехка ЕГЭ дӀаеннараш 3,5 эзар дешархо ва. Цхьацца гӀалаташ бахьан долаш, юкъера дӀабаьхараш – 61 саг, дӀадахача шера хиннарел 96 саг кӀезигагӀа. Иштта ханал хьалха экзаменаш дӀакъовлаш дола хьал а дикка лохагӀа да укх шера. Из хоам «Сердалога» бир мехкадаь зарбан болх лелабераша.
ЕГЭ дӀаялара болх боаггӀача боараме дӀагӀоргболаш, къахьегаш хиннаб мехка тов бетта денз. Ишколай кулгалхошца, хьехархошца кхетаченаш дӀакхухьаш, дешара программашка хьожаш, дешархошта психологически оагӀонцара гӀо лоаттадеш болх баьб мехка. Экзаменатораш кийчбеш а дикка къахьийгар - 1400 совгӀа хьехархо дешаш хилар ИПК. Экзаменашта беш бола тӀахьожам а дикка чӀоагӀбир. Федеральни оагӀонцара 80 болхло вар экзаменаш дӀалуча моттигашка, иштта 22 саг - берий даьшта, ноаношта юкъера.
«Технически оагӀонцара Ӏилмаш харжара болх тоалуш латтилга гуш да тахан. 100 баллага кхоачаш экзаменаш дӀаеннай вай бархӀ бера», - белгалдир мехкадас Келаматанаькъан Махьмуд-Ӏаьлас. Геттара гӀадвугаш да укх шера вай бераша 252 дошо, 133 дото майдилгаш йоахаш дешар чакхдаккхар а.
«ЕГЭ дӀачуялара болх теркалбича гуш да, уж майдилгаш йоагӀаш еннилга. Вай массане котало я из! Вай беррига дешархой даькъалабувц аз, шоашка товш йола, пайдане хургйола балха говзал хоржаш дӀахьолба цар шоаш дӀахо хьоргбола никъ!» - аьлар вай Мехкадас.
