Дӏайха хий лоаттадеш бола токацара яй, иштта кхыйола хӏамаш лочкъаяьр лохаш хилар полици
Наьха цӏагӏа чуваьнна, хӏамаш лочкъаяьр малав тохкаш; къахьийгар Магӏалбикерча полице болхлоша. Из хоам «Сердалога» бир МВД.
Россе МВД «Магӏалбик» яхача МО болхлошка леткъача вахархочо дийцар, Магӏалбике хьалдеш латтача ший цӏагӏара дӏайха хий лоаттадеш бола токацара яй, йӏовхал лоаттаю радиатораш, иштта кхыйола хӏамаш лочкъаяьй, аьнна.
Цу моттиге дӏабахача полице болхлошта дайра, лочкъор де венар кор дохадаь чуваьннилга, тоадеш латтача цӏагӏара зуламхочо ялх радиатор, дӏайха хий лоаттаду токацара боккха яй, лобзик, УШМ (болгарка), токацара бурув дихьалга. 150 эзар сомага кхоачаш зе да цу хӏамай даьна хиннар. Цу сахьате тохкама болх дӏабахьа эттача ӏаьдала болхлошта гучаваьлар наьха хӏаман тӏакховда эхь ца хийтта кхо саг.
Царех ши саг хьалхагӏа наркотикаш, къоал бахьан долаш бехктокхаме эза хиннав. Хьаьнала, хьарама яхар къоастадеш боацаш; наьха хӏамаш лочкъаяь паргӏатта лела лаьрхӏа хиннараш карарча хана ӏаьдала кара ба. Шоашта боагӏа бехк боаггӏача боараме токхаргба цар.
