ГӀалгӀайче хьалъергья ши отель, дикагӀа дола нах чубаха цӀа
Ши отель, дикагӀа дола дукха квартираш йола цӀа - инвестицей проекташ, дукха ха йоацаш хиннача кхетаче, республикан Кулгалхочун Инвестицей совета доакъашхоша могадаьр да из.
2025-2029 шерашка инвестор - «Сафмар» группа лаьрхӀа я Магасе, Наьсарен-Шахьаре кхаь а пхе а седкъан гостиница хьалъе. Бизнес-проекташ кхоачашъяра дӀадохийтаргда 900 млн сом.
Кердача пхе седкъан отеле хургья тайп-тайпара хьалаш дола 64 номер. Хьаьшашта лаьрхӀа хургья цӀенача фега аравала таро йолаш ресторан, СПА-даькъ тӀара бассейн, тренажёрий зал. Кхаь седкъан отеле хургья 70 номер, цига машинаш дӀаоттае моттиг хургья, кхуркхолгаш, спортивни майдаш а хургья.
Цу отеле а хургья тренажёрни зал, бизнес-центр, дукха кхыйола кхетаченаш дӀаяхьара йола моттигаш а. Хьаьшашта аттагӀа хургдолаш, 3000 машин дӀаоттае моттиг а хургья.
«Цу тайпара хьалаш вай мехка хиларо ГӀалгӀайчен керда сибат доаккхаргда. Уж гостиницаш хинна Ӏергьяц, уж- керда таронаш, керда балха моттигаш, зӀамига кхетаченаш дӀаяхьа, кхыдола хьалаш хьакхолла йиш йола моттигаш я, керттердар да туристаш республике дукхагӀа бахкара йола таронаш уж хилар», - аьлар Келаматанаькъан Махьмуд-Ӏаьлас, ше из проект могаеш.
Цига, Магасе 23 микрорайоне хьалде лерхӀача дикача цӀеноех дувце, укхаза уж хьалдайтар ва «Инвест ТрейдСервис». Цу тайпара шин 14-зза вӀаштӀара даьча цӀеношка хургья 636 квартира. Уж балхаш йистедаха лерхӀ 2027 шера.
«Уж йоккхий проекташ я, тха декхар да царна ма хулла новкъостал дар, инвестораш хьаллацар», - аьлар ГӀалгӀайчен Кулгалхочо.
