Гӏалгӏай мехка хьалъергья, керда дарбан моттигаш
Илдарха-Гӏалий тӏа, иштта Гӏалгӏайчен гаьнарча юрташка хьалъе лерхӏ лорий моттигаш. 2030 шерга кхоачаш лорашта йиъ гӏишло хьалъергья «Дӏаьха а дика а вахар» яхача къаман проекта чуйоагӏаш. Из хоам бу Гӏалгӏай Республикан Кулгалхочун, Паччахьалкхен зарбан болх лелабераша.
Керттера гӏишло – из керда, дукхача оагӏоний Илдарха-Гӏалан дарбанче я. Из моттиг я 886 млн совгӏа мах болаш, 550 саг цхьан сменах тӏаэцара лаьрхӏа, цо таро лу дийнахьа 60 моттиг йола стационар хилийта. Унахой тӏаэца болалургба, 2029 шерал тӏехьа доацаш.
«Хӏанзара Илдарха-Гӏалан дарбанче йола дукха ха я, мехкдаьттхой хинна общежити я, 1959-1960 шерашка денз, из аварийни хьале яр»,-аьлар мехка кулгалхочо Келаматанаькъан Махьмуд ӏаьлас.
Цул совгӏа, цу программанна чуйоагӏаш я Пхьилекъонгий-Юрта 200 саг тӏаэцаш хургйола дарбанче. Из хьалъе лерхӏ 2029-2030 шерашка кхоачаш, иштта Даьттагӏа, Арште ФАПаш а.
Къаьстта йолча программанна чуйоагӏаш, республикан ялх лорий моттиг я, цу юкъе Жӏайрахьа кхален дарбанче а йолаш. Таханарча заман гӏирс лургба, унахцӏено меттаоттаяра даькъа лаьрхӏа.
