Низ бара духьала лоаттабе безача къовсамах дийцар мехка
Терроризм яхача доккхача зулама духьала къовсам лоаттабеча комиссе кхетаченаш дӀакхухь тахан, МагӀалбика кхален моттигашка. АТК оагӀон хьалха латташ волча Джамболатанаькъан Мухьмада къамаьл дир Сирийски Арабски республике дӀабахарий гаргарча нахаца.
«Терроризм, экстремизм яхача доккхача зуламаша наьха вахар халача даккхарах дийцар кхетаче. Царна духьала къовсам лоаттабарах, кхувш латтараш цу бӀехача гӀулакхах лорабарах хьоахадир. Тахан кхувш латтарашта массахана терко е езилга, фийла хила везилга, къонача тӀехьен из мел доккха во да белгалде дезилга дар керттерчарех», - дийцар «Сердалога» МагӀалбика кхален администраце.
Цу оагӀонцара кхетаченаш каст-каста дӀакхахьар чӀоагӀа лоархӀаме да тахан. Интернете гӀолла зулам доаржадераш хоабелча, уж гучабоахаш, кагирхой цӀенача, беркатеча хӀаман тӀахьехаш болх лоаттабе беза массане. Эггара хьалха ший цӀагӀара дӀадоладе деза из гӀулакх.
