ГӏалгӀайченна хьалъеш я керда филармони
Республикан столице дӀахьош ба Хамхой Ахьмада цӀерагӀа керда Паччахьалкхен филармони хьалъяра болх. Карарча хана болхлой аьшка чӀийнашца бувзабенна пенаш чӀоагӀду болх беш боахк, гӀишлон тӀера керттера гӀов хьадеш, яхаш, хоам бу ГӏалгӀай Республикан Кулгалхочун, Паччахьалкхен зарбан болх лелабераша.
Деррига кийчон балхаш даь даьннад. Уж чӀоагӀа кӀийле йолаш хургдолаш лард дӀайоллаш латт, гӀишло моллагӀча Ӏалама хувцамашта духьалъотталуш хургйолаш. ГӀишлонхой керттерча пенашца беча балха юкъе да концертни зала опалубкаш оттаеш, шоллагӀа этаж чӀоагӀъеш йола блокаш оттаяр.
Филармоне архитектуран проекта чуйоагӀаш я ши блок, уж хотташ юкъ а йолаш. ГӏалгӀайчен кулгалхочо Келаматанаькъан Махьмуд-Ӏаьлас белгалдир, из духхьал керда гӀишло хинна Ӏац, из лоархӀаме гӀа ба мехка культурни вахаре боаккхаш бола:
«Итташ шераш доахаш, халача хьалашка болх беш хиннаб вай артисташ, хӀанз цар таро хургья шортта моттиг а йолаш, 800 сага лаьрхӀача йоккхача зале, таханарча заман хьалаш чудолча гӀишлон чу къахьега.
Филармони коллама центр хургья, цига хьакхолларгья сийрда проекташ, юкъебаргба начӀал дараш».
Проекта чуйоагӀаш я лакхе белгалъяьча йоккхача залал совгӀа, иштта зӀамагӀа йола зал, фойе, сценаца ювзаенна моттигаш, касса, вестибюль, кхыйола эшаш долча гӀулакха лаьрхӀа фусамаш. Из гӀишло хьалъяь яргья 2026 шера оагӀой бетта, «Культура» яхача къаман проекта чуйоагӀаш.
«Со тешаш ва, цу проекто гӀалгӀай культуран керда лоархӀаме оагӀув хьаелларгхиларах. Иштта таро лургья кхоллама коллективашта дикагӀа къахьега; цул совгӀа, из хургья йоккхача ерригроссийски, халкъашта юкъерча кхетачений майда», - аьлар Мехкадас.
