Ветераний ЦӀен кхоалагӀа фусам хьалъеш боахк мехка
Ветераний ЦӀен кхоалагӀа фусам хьаеш, боккха болх ба мехка дӀахьош латтар.
Мехкадаь зарбан болх лелабераша белгалдечох, 1992-ча шера хьалдаьча цу ЦӀен хьалхара фусам тоаеш дола балхаш укх шерарча маьтсела бетта дӀадоладир. Къаьнара гӀишло вӀашагӀ а яьккха, цунна когаметта 50 моттиг йола 1600 кв метрага кхоача кхозза вӀаштӀара яь гӀишло хьалъергья.
Карарча хана эггара хьалхара, лаьттанцара балхаш чакхдаьннад. Болх сихагӀа йистебаргболаш, кхы тӀа тоабаш оттаяь, шин сменах къахьегаргда цига. Цу оагӀонцарча министерстве белгалдечох, хьатӀадоагӀача шера аьтинга бетта кийча хила езаш я гӀишло, Дала аьннадале. Цу проекто дӀалаьца ахча 263 млн сом да.
«Демографи» яхача къаман проекта «БоккхагӀбараш» яхача федеральни проектага гӀолла дӀахьош ба из болх.
«Болх йистебаьлча, боаггӀача боараме терко еш йола унахцӀенон оагӀонцара моттиг хиларал совгӀа, вай ветеранашта эшаш дола гӀо лоаттаду, паргӀатта салаӀа, шоашка хьажийта йиш йола; тахан шоаш лоархӀаме, массанена безаш нах болга царна дӀахайташ йола беркате моттиг хургья цох», - аьлар вай мехкадас Келаматанаькъан Махьмуд-Ӏаьлас.
