Гӏалгӏай мехка дӏахьоргья, «Дошо гӏала» яха Хӏ кинофестиваль
Гӏалгӏайче, лайчилла бетта 15-ча денгара 20-ча денга кхаччалца, кинематографически искусствон центр хургья - республике дӏахьоргья Xӏ-гӏа Халкъашта юкъера «Дошо гӏала» яха кинофестиваль. Карарча шера дукхагӏа терко тӏайохийтаргья патриотически фильмашта, уж хетадаь да ВОВ Котало яьккха 80 шу дизара.
Яхьа программе дакъа лацара дола дехар дӏаэцааргда ардара бетта 25-ча денга кхаччалца. Кино дукха дезараш таро йолаш ба исбахьален, иштта документальни фильмаш го республикерча итт совгӏа йолча майдан тӏа.
Шоай балхаш гойтаргда начӏал долча дерригача дунен тӏарча кинематографисташа. Фестивала кхело белгалбергба дикагӏбараш тайп-тайпарча доакъошка, цу юкъе «Дикагӏа дола гӏалгӏай фильм», «Дикагӏа дола Къилбаседа Кавказа фильм», «Дикагӏа дола документальни фильм», иштта кхыдола доакъош хургда цига. Дерригаш - ийс.
«Оаха йоккха терко тӏайохийт Гӏалгӏайчен культура, искусство дегӏаяра. Итт шу совгӏа ха я вай республико кинематографа говзанчаш гулбу: актёраш, режиссёраш, продюсераш, кинокритикаш. Уж ба тайп-тайпарча моттигашкара, Россера, иштта доазол арахьара», - аьлар Гӏалгӏай Республикан Кулгалхочо Келаматанаькъан Махьмуд-ӏаьлас.
Белгалду, «Дошо гӏала» яха кинофестиваль дӏахьош я 2014 шера денз, Гӏалгӏай Правительствон, Россе кинематографистий Союзо хьалхадаккхарах.
