Хий тоаде денна ахча лочкъадаьрий гӏулакх тохкаш ба, мехкара законаш лорадераш
Хий тоаде аьнна къоастадаь ахча диараш гучабоахаш, болх дӏахьош ба мехкарча тохкама оагӏон болхлой. Из хоам «Сердалога» бера цу моттигера.
«Тохкама болхлоша белгалдечох, 2025-ча шера кӏимарса бетта мехкарча гӏишлошъяра балхех йолча министерствони коммерчески моттигаи юкъе, Илдарха-Гӏалий тӏара хий тоадергдолаш, 160 млн мах бола бартчӏоагӏам баьб.
Коммерчески моттига кулгалхочо чакхбаьккхача балхах дола каьхаташ харцахьа оттадаь хиннад, хӏаьта царна дӏадахьийта ахча каьхаташка хьежжа да», - йоах хоамо. Гучадаьлар, шахьарера хий хӏанз а болх чакхбаккханза латтилга, гӏишлон балхех йолча министерствонна цу гӏулакхо 1 миллион совгӏа зе даьд.
Тохкамхоша ма дарра хьатохкаш латт из гӏулакх тахан, ахча диараш боаггӏача боараме бехктокхаме озаргболаш.
