Кавказе лаьттача тӀема турпалхой сийна, Коталон байракх йоаржаергья ГIалгIайче
02.10.2023 11:10
ГӀалгӀайче кийчлуш ба, Кавказе лаьттача тӀем тӀа немце-гӀаьрхо вохаваь 80 шу дизар дезде. 1943 шера ардара бетта ийслагӀча дийнахьа гитлеровцаш Кавказа лаьттара лелхабир, из ха вӀалла йицлургйоацаш йисай советски бӀухой-котбаьннарий тӀехьен дегашка. ГӀалгӀайчено, Сийлахь-боккхача Даьймехка тӀем тӀа ший мехкарий, къонгаш латаш хилара сийна хетаяь, массанахьа йоаржаергья Коталон байракх. Из лоархӀаме йола кхетаче дӀахьоргья гӀалгӀай къам мехкахдаккхара дагалоаттама Мемориальни комплексе, Наьсарен доазон тӀа.
«Цу дийнахьа, тӀема сийлен шахьаре йоккха Даьхенцара безам совбоаккхаш йола кхетаче хургья. Из хетаяьй Кавказ йоаккхаш лаьттача тӀем тӀа немций-гӀаьрахой эскар дохадара 80 шу дузаш хилара, иштта МагӀалбика шахьара «ТӀема сийлен шахьар» аьнна Российски Федераце сийдола цӀи енна 16 шу дизара», - аьлар «Сердало» газетага мехка паччахьалкхен болхлоша. - Из болх вӀашагӀбеллараш ба къаман гӀулакха йола Федеральни агентсво, «Седкъа» яха культуран, спорта, кхетам балара проекташ кхоачашъю Центр».
Уж латт «Бохаргбоацараш» яхача халкъашта юкъерча проекта керте а. Цар, дӀадахача шера денз, новкъостал ду СНГ мехкий кагирхой юкъарлонна, цо а къахьег вай Даьхе лораеш, денал гойташ духьаллаьттарий цӀераш йиц ца ялийта гIерташ.
